Comentarios
O xesto de agresividade do guerreiro, que sostén un escudo coa súa man dereita, mentres amosa a man esquerda co puño pechado, é unha directa invitación ó combate.
A luz rebota e proxéctase sobre o escudo, o que se converte nunha pantalla que protexe o guerreiro anónimo, sen rostro, un inimigo invisible. A forza contida na pequena peza de bronce descóbrese pola concepción compacta das súas formas que revelan unha preferencia polos volumes xeométricos, permitindo combinar a figuración e a abstracción cun resultado final que sorprende pola súa coherencia e harmonía.
A obra rómpese, transgrede as formas tradicionais. O seu corpo perfecto, de suaves e brillantes planos, vese violentado con rupturas na propia peza que xeran contrastes lumínicos e de textura que recordan propostas de Boccioni pero, neste caso, non se pretende acentuar a sensación de movemento ou de dinamismo -o guerreiro parece ancorado ó chan- senón incidir na tensión e a intensidade do momento.
